منوعات
05 ديسمبر 2016 ( 830 المشاهدات )
الإعلانات

قواعد لف السجائر الأربعون






 


١. ما تسألش حد انت بتشرب لف ليه؟
٢. ما تطلبش منى ألف لك سيجارة علشان عايز تجرب، أنا مش ماما، ولا صاحبتك، ومش مهتم أصلا تجرب أو لأ.
٣. عبقريتك فى اكتشاف إنها شُبهة وممكن حد يفتكرها حشيش ممكن تحتفظ بها لنفسك.
٤. فيه نوعين من التبغ، نفس الكيس، ونفس الماركة، لكنهم مختلفين تماما. نوع مليان خشب ونوع نضيف، إزاى تفرق بينهم؟ استخير وتوكل.
٥. ورق البفرة أنواع، ليه النوع ده بعينه؟ شبه سؤال انت اتجوزت مراتك ليه؟ ربنا عايز كده.
٦. مش هـ لف لك سيجارة، ترضى حد يدخل معاك الحمام لا مؤاخذة يساعدك؟
٧. السيجارة اللف ما بتلفش على اللى قاعدين، مش حشيش هو!
٨. بشرب لف ليه؟ خليك فى حالك.
٩. ما تلفش وانت سايق، هـ تبهدل بنطلونك والعربية وممكن تخيش.
١٠. لأ ما بتكسفش ألف سجاير فى الأماكن العامة.
١١. مفيش علاقة بين السجاير اللف والعمق، هو أى تنميط وخلاص؟
١٢. لو ضابط فى كمين شك فيك لفله سيجارة وخليه يجرب بنفسه.
١٣. مش هـ لف لك سيجارة، المثل بيقول لا تعطنى سيجارة ولكن علمنى اللف.
١٤. ماكنة اللف مقبولة فى أول شهر شرب.
١٥. صاحب الحلوة، اخطب اللى فهماك، اتجوز اللى تصاحبك، ونقي اللى بتعرف تلف سجاير .
١٦. السجاير اللف مقاولة مش مناولة.
١٧. مفيش علاقة بين السجاير اللف والموضة، كفاية تنميط بقى.
١٨. بشرب سجاير لف ليه؟ هـ سيبك تاكل فى نفسك لحد القاعدة الـ ٤٠.
١٩. السيجارة اللف تتلف قبل ما تدخل الحمام، مش وانت قاعد جوا.
٢٠. السجاير اللف والولاعة السخان، ثنائية زى حسام وإبراهيم، تامر وشرين، الدورى والكأس، أحمد عز وزينة.
٢١. "حزين من لا يحتفظ بولاعة جنب قاعدة التواليت" غاندى ربيع ١٩٨٠.
٢٢. لو لاقيت ورق البفرة اللى بتحبه اشترى على الأقل ٤ دفاتر، الدفتر الأبيض ينفع فى اليوم الأسود.
٢٣. لف السجاير بإيدين مبلولة كدقيق نثروه فوق شوك ثم قالوا لحفاة يوم ريح اجمعوه.
٢٤. بشرب سجاير لف ليه؟ مش مهم. المهم نبقى كده، وأغلق قبضة يده وعملها كده هو.
٢٥. هـ تلف تلف وهـ ترجع لفرجينيا الذهبية.
٢٦. مش علشان مصاحب واحدة بتعرف تلف ورق عنب يبقى هـ تعرف تلف سجاير، المشاهدة حاجة والممارسة حاجة تانية خالص.
٢٧. عادى تستلف من واحد ورق، أو فلاتر، أو تبغ، بس يلفلك لأ، فيه حد يلف لحد ما يعرفهوش؟ الكلام ده فى جواز الصالونات بس.
٢٨. اللفاف برىء حتى تشرب سيجارته.
٢٩. الفرق بين الفلتر التخين والرفيع، والطويل والقصير، زى الفرق بين درجات اللون الأحمر ... ولا حاجة.
٣٠. ناقص ١٠ قواعد ركز فيهم، جه منهم إمتحان السودان ٩٦.
٣١. أمك هـ تدخل عليك وانت بتلف، هـ تشهق كأنها قفشتك مع واحدة فى سريرها هى وأبوك، وهـ تضرب على صدرها، وتقول لك: حشيش يا حسام أو يا حيوان. كمل لف وبالتصوير البطىء أوى طلع لسانك وخلى إيدك تترعش وانت بتلزق السيجارة (يا سلام لو كان تحت عينك أسود). وقول لها بمنتهى الدراما: أنا مش حسام أو الحيوان ابنك، أنا رحت سكة مفيش منها رجوع.
٣٢. لو ماما مدخنة ممكن تخليها تجرب.
٣٣. أيوا طبعا ممكن ألف لصحابتى وما ألفلكش، مازال الموضوع مقبول لو مع واحدة.
٣٤. ما تشغلش فيروز ولا تطلب قهوة الصباح قبل ما تلف سيجارتك، علشان ما تلاقيش نفسك فى نص الغنوة والقهوة بردت.
٣٥. السيجارة اللف حب من أول نفس، مش هـ تحبوا بعض بعد الإدمان.
٣٦. سيب فلاتر فى تابلوه العربية، وشنطة اللاب توب، وفى الشغل، وفى جيوب الجاكتات. يوما ما هـ تحتاج فلتر، اعتبر نفسك بتسلف نفسك بصورة مستقبلية.
٣٧. فرك التبغ وتقسيمه على كيسين، عامل زى خطط التقشف بتاعة الحكومة. حبة التبغ اللى هـ يقعوا وانت بتطلع من الكيس وتفرك وقتى مش دول اللى هـ ينفعوك يوم الزنقة.
٣٨. ورق بُنى إيه بس؟ الكلام ده لو عايز تعجب صاحبتك اللى فى ٢/٣.
٣٩. والله العظيم ما هـ لف لك سجاير aka أقسم بالله ما ولادى.
٤٠. أرخص، أنضف، وأقل فى عدد سجايرك اللى بتشربها يوميا.
٤١. مش هـ لف لك سيجارة، أنا مباحث.

ينصح بمشاهدتها

الإعلانات

قد يعجبك ايضاً

خمس تصرفات هتخسرك الوظيفة لو عملتها فى الإنترفيو رجلٌ لم ينم منذ 40 عاماً وطفل يرى في الظلام.. 5 أشخاص يتمتعون بقوى خارقة ازاي تظبط بنات في الجامعة أكتر ٦ شغلانات مفهومة غلط في مصر