منوعات
12 ديسمبر 2016 ( 715 المشاهدات )

كام شغلانة لو فاتك الميري "إتمرغ" فى ترابهم

أكييد مفيش حد فينا مش عايز يزود دخله ويخلى الدنيا كده تلعب معاه حتى لو مرتبه كويس، برده مفيش مانع إنه يخليه كويس حبتين. الناصح فى الزمن ده هو إللى تلاقيه داخل فى كذا حاجة وبيطنطط طول اليوم ما بين الشغل وبيدوس فى كذا مجال، بيستغل كل طاقته وأى موهبة عنده ويعرف إزاى يستفيد منها ويحولها لمكسب.


أنت كمان أكيد عندك موهبة، أى موهبة..صغيرة كبيرة، حرفية أو عملية أو فنية، المهم إنك لازم يكون عندك موهبة خاصة بيك ولازم تعرف تستفيد منها وتنميها صح. وعلشان نسهلها عليك هنقولك إيه هى مجالات الشغل ال part time إللى ممكن تشتغلها بجانب شغلك الأساسى، بس أهم حاجة إنك تختار شغل ال part time بالذات حسب موهبتك أو تختار حاجة بتحبها علشان دا السبب الوحيد إللى هيخليك تقدر تكمل ومتقعش فى النص أو تكسل وتستسهل وتقول كفاية عليا حاجة واحدة.


بص ياسيدى، أول حاجة.....

السوشيال ميديا “Social Media Specialist”

social-media.jpg


ودى يمكن من أوائل المجالات إللى دخلت بقوة فى إطار ال part time ويمكن كمان تكون هى أصلا إللى ساعدت على إنتشاره بشكل كبير خصوصا فى مصر. ودى يمكن مش محتاجة موهبة أوى غير إن دماغك تكون صايعة كده وتطلع أفكار ألماظات، لكن الحاجة الأساسية هى حبك وشغفك للتكنولوجيا والسوشيال ميديا نفسها، يعنى تكون بتحب تقعد كتير على النت وتقلب كده فى كذا platform من غير ما تحس بملل، كمان لازم تكون حابب فكرة التعلم بإستمرار ليه بقى؟! هبسطهالك..لأن الوظيفة دى عاملة زى وظيفة الدكتور كده بتكون محتاج دايما تتابع الجديد من مقالات وحملات إعلانية وسياسات الإستخدام الخاصة بكل channel خصوصا الفيس بوك لأن عم مارك مش وراه حاجة غير إنه يغير ويطور، فكل لما تلاقى نفسك فهمت ال policy بتاعته يقوم واخدك على خوانة ويشقلب الفيس بوك كله وترجع أنت تبدأ من الأول . إزاى تلاقى شغل ك part time فى السوشيال ميديا دى سهلة أوى، لأن معظم الشركات والعملاء تقريبا بيفضلوا يتعاملوا بشكل part time أو freelance مع مختصين السوشيال ميديا أكتر من تعاملهم مع شركات مختصة علشان دا بيحسسهم إنهم كدا مش بيضحك عليهم، فأنت كل إللى عليك إنك تتابع مواقع التوظيف المختلفة وصدقنى هتلاقى فرص كتير أوى مستنياك.

كاتب أو محرر “Writer/ Editor/ Copy writer”

writer2.jpg


الوظيفة دى عكس إللى قبلها تماما لأن كل إللى بتحتاجه ككاتب أو محرر هى الموهبة بعيدا عن أى مجال درسته أو وظيفة بتشتغلها، موهبة الكاتبة سواء كانت كتابة صحفية من مقالات خاصة بيك مثلا أو كتابة أحدث الأخبار فى مجال معين وإللى هو ممكن يكون مجال دراستك مثلا أو شغلك ودا هيخلى الموضوع أسهل، أو ممكن تكون كتابة إبداعية وإللى بيسمى copy writer زى إنك تكتب إعلانات أو مواد دعائية أو تكوًن فريق مع واحد صاحبك شغال فى السوشيال ميديا وتبقى مسئول عن كتابة ال content لشغله.

الجرافيكس “Graphic Designer 2D/3D”

graphic-designer-2.jpg


ودا ضلع المثلث الأخير إللى بيكمل الاتنين إللى فوق، فلو أنت designer وربنا كرمك بإتنين أصحاب واحد كاتب والتانى سوشيال ميديا، يبقى أبشر يا تيمووور...الأيام دى أيامك يابنى أوعى متستغلهاش ومين عارف يمكن الموضوع يقلب جد وتلاقى نفسكوا بعد كام سنة جمعتوا شوية عملاء كويسين وتفتحوا الشركة بتاعتكوا. بس الوظيفة دى للأسف من الوظايف إللى مينفعش تدخل فيها ك part time إلا لو أنت أساسا فى المجال دا.


مدخل بيانات “Data Entry”

data-entry2.jpg


الوظيفة دى بالذات فيها سر كبير أنا عنى نفسى معرفوش..وهى إنها ممكن تدخلك مبالغ مهولة كل شهر، فالوظيفة دى أكتر الشركات إللى بتطلبها هى الشركات الأجنبية الموجودة فى مصر وإللى بتحتاج تدخل بيانات كتير فى ال system بتاعها زى بيانات عملاء أو موردين أو معلومات خاصة بالشركة نفسها.

باحث “Online Researcher”

online-researcher.jpg


إنك تكون لاجئ على الإنترنت لأوقات طويلة وقادر تجيب المعلومة حتى لوكانت فى كولالمبور، وياريت لو تكون فى مجال شغلك الأساسى أو قريبة منه علشان دا هيساعدك ويسهل الموضوع عليك أكتر. ودى من الوظائف السهلة ك part time لأنك ممكن تعملها فى البيت، على القهوة، قبل ما تنام أو فى الويك إند لو قاعد زهقان. كمان المجال دا هيساعدك أنت شخصيا هيخليك متفتح كده وعندك معلومات بالهبل ومتابع لكل جديد، من الآخر يعنى هتخليك سابق وتطلعك لقدام كام سنة.


الإيفينت “Event Planner/ Usher”

event-Team.jpg


من غير أى جدال كلنا عارفين إن المجال دا بقى طالع ومحدش بيقولوا رايح فين، ومش فى مصر بس ولكن على مستوى العالم كله، كمان كلنا بنحب نحضر الإيفينتات حتى لو كانت من نوع معين زى إيفينت علمى مثلا أو بيزنس أو ترفيهى، حفلة، معرض، فستيفال أو غيرهم كتير . فكونك بتشارك فى تنظيم الإيفينت أو التحضير يومها بس دا هيدخلك مبلغ فى اليوم الواحد مش بطال وكمان هيخليك تحضر الإيفينت من غير ولا مليم. دا غير لو ربنا كرمك وإتشدت فى حاجة بره مصر وما اجمل دبى فى المجال دا بالذات، هتشوف عالم مختلف جدااا وهتعيش تجربة هتبسطك ويمكن تغير حياتك حتى لو كانت من غير مقابل مادى. أهم حاجة لازم تعملها علشان تعرف تدخل الجو دا هو إنك تثبت نفسك مع شركة أو فى أول إيفينت ليك ودا من خلال إنك تكون إجتماعى لأبعد الحدود وبتعرف تتصرف مع المشاكل المفاجئة وتاخد قرارات صح وبسرعة، ساعاتها بس هتضمن مكانك معاهم فى أى إيفينت جاى ودا هيوسع دايرة معارفك وهتلاقى نفسك مقضيها كل يوم فى إيفينت.

مصور “Photographer”

photographer-3.jpg


كمان المجال دا بقى من المجالات "الموضة" اليومين دول، والحقيقة إنه مع كتر المصورين وزياداتهم كل يوم إلا إن كل واحد منهم قادر إنه يحقق نجاح بعيدا عن الباقيين، فمتخافش وإدخل بقلب ميت. وعلشان تبنى لنفسك صح، ممكن تبدأ الأول توزع هدايا!! أيووه زى مابقولك كده، يعنى تعمل جلسات تصوير ببلاش لأصحابك، قرايبك، إخواتك ، جيرانك المهم تلم عدد على قد ماتقدر ودا لييه بقى؟؟ علشان تقدر تفرج الناس على موهبتك ويشوفوا قد إيه أنت شاطر، لأن مفيش حد ممكن يدفع فلوس ويغامر بحفلة خطوبته أو فرحه مع مصور مشافش شغله قبل كده. فبيكون الحل إنك تعرض موهبتك وتظهرها للناس وبعدها هتلاقيهم هم إللى بيطلبوك بالأسم.


مدرس مساعد “Teaching/Lecturer Assistant”

assistant-prof-.jpg


ودى مهنة بتديلك برستيج كده وسط الناس ملوش حل، وتحسسك فجأة إنك بقت من طبقة النبلاء والإرستقراطيين. والحقيقة إنها مش بس هتزود دخلك لكن كمان هتخليك تحس إنك إنسان تانى لأنك هتحس إن فى حد محتاجلك وبيسألك وهتحس إنك بتساعد ناس كتير أوى فى مستقبلهم ، بالإضافة إلى إنك هتكون خبير فى مجالك ومش بعيد أبدا إن فرصتك كمساعد لدكتور جامعة أو بروفسور تفتحلك أبواب شغل كتيرة فى شركات كبيرة وتخليك تعلى فى شغلك بسرعة.

مدرب “Trainer”

trainer2.jpg


هنا أنت لازم تكون وصلت لمرحلة متقدمة شوية فى شغلك وبقى عندك عدد سنين خبرة تسمحلك إن تقف تعلم وتحاضر وتدرس لناس جاية ودافعة فلوس علشان تستفيد منك. فسواء بقى كنت مدرب فى إيفينت معين مثلا لمدة كام يوم وخلاص، أو إتفقت مع مركز تدريب معين أو مراكز التعليم المستمر فى الجامعات الأجنبية، كل دا هيوصلك لنفس النتيجة . أهم حاجة يكون عندك ملكة التعليم والشرح يإما من غيرهم وحتى لو كنت واخد نوبل فى مجالك مش هيكون ليك مكان فى مهنة التدريب .

ينصح بمشاهدتها

قد يعجبك ايضاً

رجلٌ لم ينم منذ 40 عاماً وطفل يرى في الظلام.. 5 أشخاص يتمتعون بقوى خارقة لو مش معاك غير 100 جنيه بس ..حطهم فى البنك 14 نصيحة علشان تعجب بنت single مبتفكرش فى إرتباط قواعد لف السجائر الأربعون