منوعات
10 ديسمبر 2016 ( 5993 المشاهدات )

لو مش معاك غير 100 جنيه بس ..حطهم فى البنك

كتير من الناس ماعندهاش حسابات بنكية وبتفضل تسيب فلوسها يا أما فى البيت تحت البلاطه .. يا أما بيشتروا بيها حاجات زى دهب او دولارات .. وفى ناس ممكن تكون بتقبض مرتباتها على فيزا atm وبيحوشوا فلوسهم جوه الفيزا دى !!


ومش واخدين بالهم إن ممكن الفلوس دى يستفيدوا منها لو أدخروها فى حساب توفير لأن فيزا المرتبات دى مالهاش عائد من البنك فممكن يكسبوا من فوائد البنك أو ممكن يدخروها على شكل شهادات .. على كل حال هانوضح انهارده إزاى تعرف تفتح حساب فى البنك وهانعرفك على الفوايد البنكية بأنواعها والشهادات. . . .


إيه أفضل البنوك الـ ممكن أفتح فيها حساب ؟
نفضل أن تكون بنوك مصرية زى ( البنك الأهلى المصرى أو بنك مصر أو بنك القاهرة ) والبنوك دى بتتميز بحاجتين .. الأولى : إن فروعهم كتير جدا .. الثانيه : ان الرسوم السنوية مش مبالغ فيها زى البنوك الأجنبية الـ منهم ( البنك التجارى الدولى , البنك الأهلى القطرى , بنك عودة ... ) 
غالبا الرسوم السنوية للبنوك المصرية بتكون 120 جنيه مصرى انما رسوم البنوك الأجنبية بتكون مابين 150- 200 جنيه على حسب كل بنك


طيب مميزات البنوك الأجنبية إيه ؟؟
طبعا بيكون التعامل فيها جيد جدا للعميل ده بالإضافة إنها مش بتكون زحمة زى البنوك المصرية وكمان فيها مميزات لخدمات أكتر زى تحويل فلوسك من حساب لحساب أون لاين ..

الأوراق المطلوبة لفتح الحساب ؟؟
*بطاقة الرقم القومى 
*شهادة إثبات دخل لمن هم فوق 21 عام ومن هم أقل من 21 عام أو طالب شهادة إثبات دخل ولى الأمر
*1000 جنية مصرى ( وطبعا ممكن تسحبهم أول يوم بس لازم أول مره تفتح حساب تودع 1000 جنيه ) 
ولو هاتفتح حساب بالدولار فهيكون 100 دولار أو مايعادلها لو هاتفتح الحساب بأى عملة اخرى

أنواع الحسابات ؟
الحسابات نوعين :
الأول : الحساب الجارى 
وده المبالغ الـ هاتودعها مش هاتقدر تاخد عليها فايده أو عائد البنك وبيفتحه معظم الناس الـ بيكون تعاملاتها عن طريق الشيكات لان من خلاله تقدر تطلب من البنك دفتر شيكات ...
الثانى : حساب التوفير 
وده أفضل نوع لو عايز تفتح الحساب للإدخار لان من خلاله تقدر تستفيد من فايدة البنك ...

أنواع فائدة البنك ؟
الفايدة يا أما شهرية (يعنى هاتنزل كل نهاية شهر ) او 3 شهور أو 6 شهور او سنة
وطبعا كل مايكون مدة نظام الفايده لفترة أطول كل ماهيكون العائد اكبر 
يعنى فى المتوسط كدا الفائدة الشهرية بتكون 6.65% والفائدة لـ 3 شهور بتكون 6.85% والفائدة لـ 6 شهور بتكون 7.05% والفائدة السنوية بتكون 7.25 %

الفائدة بتتحسب أزاى ؟
الفايده بتتحسب على المبلغ الـ بيمر عليه شهر كامل فى البنك يعنى من اول يوم حتى أخر يوم فى الشهر 
وطبعا نسبة الفايده دى بتكون للسنة مقسومة على عدد اشهر نظام الفايده ... يعنى ايه ؟؟
يعنى مثلا لو اودعت 10 ألاف جنيه واختارت نظام الفايده الشهرية الـ نسبتها 6.65 % 
مش هيكون العائد 10000*6.65/100 = 665 جنيه للشهر لان الفايده دى للسنه فالبتالى لازم نقسم على 12 عشان نطلع العائد الشهرى 
يعنى طريقة الحساب هاتكون كدا 
= 10000*6.65/100 / 12 = 55.4 جنيه وهيا دى فايده الشهر من مبلغ 10 ألاف ...

وخلى بالك لو سحبت فلوسك قبل مثلا يوم 29 او 30 يبقى كده انته ضيعت الفائده على المبلغ المسحوب والبنك هيحسب الفايده بس على المبلغ الـ موجود من بداية الشهر لغاية نهايته

طيب ايه شهادات الاستثمار دى ؟؟
شهادات الاستثمار دى فى الوقت الحالى هى أعلى عائد فى كل البنوك ليه .. لان مثلا لو اتكلمنا على الشهادات البلاتينية فدى الفايده بتاعتها 12.5 % وقيمة الشهادة الواحدة ألف جنيه يعنى لو معاك 10 الاف جنيه ممكن تقدر تشترى 10 شهادات بس من عيوبها بقه فلوسك البنك بيحجزها وماتأدرش تسحبها الا بعد مرور 3 سنين بس ممكن تكسر الشهادة وتاخد فلوسك بعد 6 شهور لو مش حابب تكمل بس أكيد البنك هيخصم من فلوسك جزء من مبلغ الفايدة .

ينصح بمشاهدتها

قد يعجبك ايضاً

ازاي تظبط بنات في الجامعة كام شغلانة لو فاتك الميري "إتمرغ" فى ترابهم قواعد لف السجائر الأربعون أشهر ١٠ معلومات جنسية خاطئة