منوعات
12 ديسمبر 2016 ( 921 المشاهدات )
الإعلانات

14 نصيحة علشان تعجب بنت single مبتفكرش فى إرتباط

عشان نجيب من الاخر .. يمكن البنات عموما كائن غريب؛ بس اللي مفيهوش اختلاف ان أي بنت مهما ان كانت المواصفات اللي هي بتتمناها في الراجل اللي عايزة ترتبط بية "ده لو عازت ترتبط أصلا بعد الي بتشوفه" انه يكون راجل بكل ما تحمله الكلمة من معني خصوصا لو كان بقالها كتير “single” او خلصت مرحلة العشرينات  و سن المراهقة.. 

being-single-best-check-box1.jpg

لو حظك عجبتك بنت من النوع ده خليك عارف ان عندها مبدأ "مش هتصوم و تفطر علي بصلة" فا في شوية حاجات لازم تعملها خصوصا في الأول عشان الطبخة متبوظش منك و تبقي انت بصلة في الأخر..

1) اهتم بمظهرك و انت نازل تقابلها .. متلبسش أي كلام البس اللي علي الحبل؛ متروحش شعرك منكوش عشان موضه و الهبل ده "هي خارجة مع راجل مش مراهق المفروض" ؛ ضوافرك تبقي نضيفة وجزمتك متلمعة فلة و ريحتك حلوة و غاسل سنانك. عشان هي هتستعمل تكنيكها الخاص و هتفليك حتة حتة و انت مش واخد بالك فمتقفلهاش من اول 10 دقايق.

2) حاول تبقي أعصابك هادية و مش متوتر و قاعد واثق في نفسك ومتتصببش عرقا عشان هي في الغالب هتبقي قاعدة بمنتهي الثقة ضهرها لورا و حطة رجل علي رجل و بتتفرج عليك كأنها بتتفرج علي التليفزيون بمنتهي برود الأعصاب.

x240-fa8.jpg

3) حاول تختار المواضيع اللي هتتكلم فيها و بلاش افورة ملهاش لازمة و انت بتتفشخر بأمجادك و تحكيلها بطولاتك مع البنات اللي قبل كدة عشان هي في الغالب هتعد تهز راسها و عاملة نفسها بتسمعك و هي أصلا مش فارق معاها رغيك و تفاصيلك اللي ملهاش لازمة .. هي كدة كدة لسة مدتكش إشارة انك تقتحم حياتها و تعرف تفاصيل ملهاش لازمة.

4) بلاش السؤال الغبي "انتي مرتبطيش لية لحد دلوقتي؟" عشان ده سؤال ملهوش لازمة ولا إجابة عندها و بيخلي منظرك طربش علي الفاضي عشان مفيش غير إجابة واحدة للسؤال ده و هي "حكمة ربنا" بما معناه "وانت مال أهلك" في سرها.

maxresdefault.jpg

5) حلو يبقي دمك خفيف بس مش لازم تستخف و توصل نفسك انها تبقي شايفاك الخليل كوميدي قاعد قدامها و تبقي عايزة تضربك بأي حاجة عشان تقفل بؤك شوية و تبطل هرتلة بدل ما انت عمال تريل علي نفسك. خليط برنس في نفسك كدة و الكلمة طالعة بحساب.

6) في جميع الأحوال متخليهاش تطلع جنية من جيبها و هي معاك. هي هتحاول لأخر نفس فيها انك متمنش عليها و تدفعلها. خليك Large و شيك كدة و أرفض رفض تام.

7) خلي في بالك ان بعد أي خروجة انت اللي تبتدي دايما و تبعتلها او تكلمها تعبرلها انك قضيت وقت لطيف معاها و انك مستني تشوفها تاني "ده لوماكنتش قررت انها تكرفلك أساسا".. و حاول متبقاش سقيل "اتقل علي الرز عشان يستوي بس خلي بالك ليتحرق .. انت و شطارتك  "

ahmed-malek-and-Gamela-3od.jpg

8) خليك راجل قيادي ذو شخصية قوية .. و الحتة دي بقي محتاجة فن و حرفة و صياعة منك في التنفيذ. البنت عموما بتحب تحس انها قاعدة مع هيركليز بس في "مخه" مش في شكله. الرجولة فن و مهارة في عين البنت مش سي السيد علي الفاضي و المليان "اعرف امتي تشد و امتي ترخي".

9) "الصراحة" من الأساسيات عشان هي كدة كدة جايبة قرارك و عارفة حاجات عنك يمكن انت نفسك متعرفهاش من غير متبينلك و هتسيبك تتكلم براحتك علي الاخر. لو قررت تحور و تعمل نفسك بورام هتفضل مكملة معاك القعدة عادي و هي واخداك علي قد عقلك و بعد كدة معطلكش.. سلام من بعيد.

10) حاول تستعمل تليفونك في الشديد اقوي .. انت المفروض مدي احترام للوقت اللي انت نازل معاها فيه عشان تقربوا و تفهموا بعض اكتر و تحسسها بأهميتها مش قاعد ترد علي صحابك وتشوف الـNotifications اللي جاتلك.

920146134538.jpg

11) متبصش علي اللي الرايحة و اللي جاية .. احنا عارفين انك راجل بصباص كدة كدة. افتكر انها ممكن تكون شايفاك قرد قاعد قدامها و كاتمة جوة قلبها و ساكتة. عشان هي كمان ممكن تبص عادي علي فكرة.

12) لو حصل و خرجتوا في مكان فيه رقص حاول تحافظ علي منظرك و متبقاش مهزأ في صورة أراجوز عمال يرقص و يتنطط و يبين مواهبه في الأكروبات. انتوا خارجين سوا في مكان لذيذ مش رايحين فرح ابن خالتك.

hqdefault.jpg

13) مفيش داعي لأي نوع من أنواع الاستعجال والسرعة في أي حاجة؛ هي كدة كدة هتفكر مليون مرة قبل ماتديك الأمان عشان هي متأقلمة تماما في العيشة مع نفسها لوحدها و مرتاحة كدة.

14) أخر حاجة.. متحاولش ولا تبقي تقيل قوي عشان متبقاش شخصية متعبة و مش مفهومة و تزهق بالنسبالها و يتكرفلك بسرعة .. ولا تبقي مدلوق علي بوذك و مدي الحاجة اكبر من حجمها. خير الأمور الوسط و انت و شاطرتك يا معلم .....

114298821.png

البنت اللي بقالها كتير Single هتلاقيها محاوطة نفسها بسور ضد أي حاجة ممكن تحس انها بتهددها بالخطر فمش بسهولة هتقبل ان ييجي حد بمنتهي البساطة يشئلبها نظام حياتها ويقتحم الهدوء اللي هي عايشة فيه.

"هي" بقت اهم حاجة في حياتها هي ... مرت بتجارب و حكايات و روايات و وقعت و قامت و قلبها اتكسر و سافرت و اشتغلت وعرفت تكبر في حاجة لاقية نفسها فيها و عرفت توصل لحاجة عايزها حتي لو كل الطرق مسدودة في وشها.. وكل ده و هي لوحدها؛ فمتتوقعش انها تسلملك بسهولة

عشان هي عرفت تملي فراغك بحاجات تانية كتير و عرفت تسد الاحتياج اللي عندها بنفسها و بقت هي الراجل اللي نفسها تلاقية بس مش موجود .. فيما يكون حضرتك زي الشحط ست الحبايب بتدورله لسة علي عروسة. فخلي في بالك انها " ممكن تبقي عايزاك بس عمرها ما هتبقي محتاجاك" و

ان مشروع الارتباط بالنسبالها ما هو الا مشروع غير أجل للتنفيذ شيء ثانوي مش محتل المركز الأول في حياتها زي ماحضرتك فاهم.

و لو "هي" قررت بعد كل ده انك "” you are the one و انك تشاركها حياتها اللي "هي" فيها نمرة واحد .. هتبقي فعلا أهم حاجة في مملكتها و هتحبك كأنها أول مرة تحب بجد. فمن الواجب عليك بعد ماعرفت كل المقدرة اللي عندها دي .. انك تصبر عليها شوية و تشغل مخك معاها و تحاول تكملها مش تمحيها ......

*لو نفذت الخلطة السحرية اللي فوق دي .. يبقي الرز استوي و مبروك مقدما 

ينصح بمشاهدتها

الإعلانات

قد يعجبك ايضاً

أشهر ١٠ معلومات جنسية خاطئة أهم خمسة تطبيقات يستخدمها محترفي الخيانة ياسمين الخطيب في إطلالة مثيرة وجريئة تغضب الجمهور.. صور أكتر ٦ شغلانات مفهومة غلط في مصر